我的未來99，我最善解人意的99。
My wonderful suocera (mother in law).
琴日因為一個電話，令我成晚把被都翻爛了都瞓唔到。
上個月我哋臨出發去阿根廷，用兩小時教曉未來99點樣用whatsapp call打俾我哋，佢覺得這種科技神奇得像魔法一樣，只要佢按”咪”個制講”阿仔，打俾我”，不消數分鐘，佢個仔就打電話俾佢。
每星期的一次通電，未來99都噓寒問暖。天氣點啊？工程進度如何啊？難買餸嘛？未來新抱又自己一個人，慣唔慣啊？...?下省廿個問號.
而每次我哋亦英文夾意大利文氹咗好耐佢先肯講佢嘅近況：老人家終於肯講...原來佢隻腳上星期增生了一個大約半個乒乓球咁大嘅物體，依家等緊照X光檢查。其實未來99一直都多病痛，有時候睇住佢行得一拐一拐的，心噏噏問佢「你腳痛嗎？」佢永遠都面不改容話唔痛，但有時我會偷偷哋望佢喱埋喺廚房煮飯時嘅表情，完全背叛咗佢嘅答案。
未來99就係咁，將所有專注力放哂喺仔女身上，你可以話咁做阿媽唔緊張仔女緊張邊個？
咁當然，不過作為一個非常傳統意大媽的未來新抱，我有時對佢嘅行為刮目相看...
有次我同意佬喺意大利屋企嗌交，大家鬧得好不快然後意佬自己一支箭咁”匙匙七七”就開車走咗去，未來99咁啱煮緊飯企咗喺我哋中間。我心諗：喺香港時我可以揮一揮衣袖一笠鎖匙就衝落街等大家冷靜一下，咁依家我走出街做乜呢？又冇凍奶茶飲，又冇得搭車揾朋友，簡直係瞌我呢啲不少數民族！
隔咗一陣，意佬打電話俾我道歉。嗚啊！何來的皇恩浩蕩，天跌落嚟嘅一句對唔住！(因為我哋平時唔會用呢3隻字去道歉的)，咁我嘅”十萬個為什麼”又發作啦，問點解，原來未來99見到我哋嗌交，打俾個仔話”人哋一個女人仔千里迢迢跟你嚟到呢度，冇人冇物，你好意思話走就走？”
俾在其他99，可能會衝上樓上炳我「你依家咩態度對我個仔？」或「你阿媽點教你嫁？」或「我都唔會逆個仔意，幾時輪到你？」仁慈啲嘅就一句”唉，啲後生嘅有後生嘅溝通方式，老人家唔理得咁多”....成件事我將意佬的道歉與否都放在一旁，我只注意到，呢個未來99看事情真的看得透徹到一個點。
平日嘅生活點滴亦令我好敬佩佢(當然我好幸運仲有個我愛慕的超級阿媽！)，雖然言語不通但我每每想表達任何事情佢都好有耐性等我逐個意大利詞彙躉出嚟，年尾留咗喺意大利4個月，99不分晝夜，不分星期1-7，總問我有咩想食，有咩可以幫到我。
我曾經問「點解你成日問住我哋意願，你自己呢？」佢答「我嘅意願就係希望見到你哋倆個開開心心，組織家庭，一直相親相愛，所以只要你哋開心，我就滿足了」雖然未正式成為媳婦，但我同未來99的感情已深厚得有時太耐冇見一返到去意大利見面，總會激動得以淚相對。
未來奶奶，你要健健康康啊！仲有幾個月你就要為我哋踏出你人生嘅另外新一步：搭飛機。我好想帶你參觀我嘅出生地，你成日煮自家製意粉俾我食，我都好想俾你試下香港嘅蝦餃燒賣。我試過幫你腳底按摩你話好正但怕尷尬唔俾我再幫你按，香港有足浴嫁唔洗自己落手落腳咁你就唔驚啦！
未來奶奶，我喺地球嘅另一端祝願你快啲好返！我阿媽老豆已執定屋等你過嚟，你到時候想食乜記得同我講，我會帶定刀叉帶你去食譚仔，盡力做個好新抱。
Mamma, get well soon.
#我的未來99
#好新抱唔易做
#慶幸我沒有野蠻奶奶
#iamreallyproudofyoumamma
#刀叉食譚仔
Search